FME blæs á athugasemdir Stafa

Fjármálaeftirlitið (FME) gefur lítið fyrir þær athugasemdir sem lífeyrissjóðurinn Stafir hefur gert við úttekt eftirlitsins á starfsemi sjóðsins. Fjármálaeftirlitið segir m.a. að óvarlegt sé að fullyrða að engir fjármunir hafi tapast í tengslum við þau atriði sem eftirlitið gerði athugasemdir við.

Á vefsíðu FME segir að vegna athugasemda Stafa lífeyrissjóðs og fjölmiðlaumfjöllunar undanfarið um athugun Fjármálaeftirlitsins á tilteknum þáttum í starfsemi lífeyrissjóðsins, vill Fjármálaeftirlitið leiðrétta eftirfarandi rangfærslur og misskilning:

„Skýrsla Fjármálaeftirlitsins vegna málsins er á sjöunda tug blaðsíðna. Gagnsæistilkynning Fjármálaeftirlitsins sem birtist á vef stofnunarinnar sýnir samandregnar niðurstöður.

Staða Stafa í óskráðum bréfum var bæði tilkomin vegna verðbréfa sem breyttust úr skráðum í óskráð og vegna óskráðra verðbréfa sem sjóðurinn fjárfesti í á árinu 2011. Saman ýtti leiðrétting verðbréfanna og fjárfestingin sjóðnum endanlega út fyrir lagaheimildir.

Þegar tekið er mið af heildareignum sjóðsins á þessum tíma nema 0,7% tæpum milljarði króna. Fjármálaeftirlitið telur ekki vafa á að svo stór fjárfesting í einu lagi sé mikilsháttar fjárfestingarákvörðun og hefði betur verið tekin af fleiri en einum aðila.

Athugasemdir Fjármálaeftirlitsins við lánveitingar Stafa lífeyrissjóðs voru m.a. vegna eftirfarandi atriða:

Lánveiting var ekki í samræmi við lánareglur sjóðsins.

Látið var viðgangast að veðskuldabréf til staðfestingar á eign sjóðsins var óundirritað.

Lánveiting til framkvæmdastjóra vegna kaupa á bifreið, sem hann hafði til umráða í starfi sínu, var ekki í samræmi við lánareglur og hliðstæð lán stóðu ekki hinum almenna sjóðfélaga til boða.

Fjármálaeftirlitið telur óvarlegt að fullyrða að engir fjármunir hafi tapast hjá sjóðnum í tengslum við þau atriði sem gerðar hafa verið athugasemdir við."