Seðlabankinn fylgist með hvort bankarnir hafi óeðlileg áhrif á krónuna

Már Guðmundsson seðlabankastjóri segir að Seðlabankinn fylgist mjög vel með því hvort þær skyldur sem viðskiptabankarnir beri á gjaldeyrismarkaði stangist á við aðra hagsmuni þeirra. Gengi íslensku krónunnar tók mikla dýfu dagana fyrir áramót og á síðasta viðskiptadegi ársins var gengi krónunnar lægra en það hafði áður verið á árinu. Bæði Viðskiptablaðið og Greiningardeild Arion banka fjölluðu ítarlega um það að Landsbankinn hefði hagnast á veikingunni vegna breytinga sem gerðar höfðu verið að skuldabréfi milli Landsbankans og þrotabús gamla Landsbankans.

Már Guðmundsson seðlabankastjóri segist ekki geta tjáð sig um mál einstakra banka. „En almennt má segja að bankarnir eru með ákveðnar skyldur sem viðskiptavakar á gjaldeyrismarkaði og þeir verða að leggja sig fram um að uppfylla þessar skyldur og þeir verða að passa sig á því að þær skyldur séu ekki að blandast saman við hagsmuni sem kunna að liggja annarsstaðar í starfsemi bankanna. Hvort svo hafi verið í þessu tilfelli skal ég ekkert fjölyrða um. Við fylgjumst alltaf með því og kannski skoðum við betur hvort það hafi verið eitthvað á einhverju gráu svæði og þá munum við hnippa í viðkomandi," segir Már í samtali við Vísi.

Aðspurður segir hann þó að það sé alls ekki svo að bankarnir í heild hagnist á veikingu krónunnar. „Það er líka þannig að ef sú veiking gengur of langt að þá eru þeir að grafa undan sjálfum sér, því þá eru þeir að auka verðbólgu og grafa undan eigin lántakendum," segir hann. Már segir að Seðlabankinn fylgist stöðugt með gjaldeyrismarkaðnum. „Við erum alltaf að tala við bankana. Okkar gjaldeyrisviðskiptaborð er í daglegum samskiptum við bankana og reyna að skilja það hvað er í gangi. Og ef að því finnst eitthvað óeðlilegt á seyði þá annað hvort lætur það mig vita eða talar í minni málum beint við viðkomandi," segir Már.