Hverjir sköruðu fram úr á vefnum árið 2012?

Lesendum Vísis gefst nú kostur á að tilnefna það sem þeim hefur þótt skara fram úr á netinu á síðasta ári. Fram til 24. janúar verður opið fyrir tilnefningar almennings til Nexpo-vefverðlaunanna á slóðinni visir.is/nexpo. Allir áhugamenn um netið á Íslandi eru hvattir til að láta í sér heyra en tilnefningarnar eru öllum opnar. Hægt er að tilnefna það sem vel er gert í nokkrum flokkum eða þeim öllum. Flokkarnir eru Vefur ársins, Herferð ársins, Bjartasta vonin, Vefhetja ársins, Áhrifamesta fyrirtækið/vörumerkið á samskiptamiðli, App ársins og Óhefbundnar auglýsingar. Verðlaunin í fyrra þóttu mjög vel heppnuð og úrslitin í flokknum Vefur ársins komu mörgum á óvart. Þá valdi almenningur skemmtisíðuna Flick My Life sem vef ársins. Þá var Stefán Eiríksson lögreglustjóri kosinn vefhetja ársins fyrir vaska framgöngu lögreglunnar á Facebook. Viðtal við hann má sjá hér fyrir ofan. "Við erum mjög spennt. Þetta eru skemmtileg og áhugaverð verðlaun sem stækka með hverju árinu,“ segir Davíð Lúther Sigurðarson, stofnandi Nexpo. Hægt er að senda inn tilnefningar til 24.janúar. Að því loknu fer dómnefnd yfir þau eftirlæti almennings sem nefnd eru til sögunnar og stillir þeim upp í endanlegar tilnefningar til verðlaunanna. Dómnefndin kemur úr ýmsum áttum vefgeirans. Hana skipa Rósa Stefánsdóttir margmiðlunarhönnuður, Jón Gunnar Geirdal markaðsmaður, Atli Stefán ritstjóri Simon.is, Hugi Þórðarsson kóðagerðarmaður og Sigrún Ásta Einarsdóttir, sérfræðingur í stafrænni markaðssetningu hjá Vodafone. Þann 1.febrúar hefst síðan kosning hér á Vísi og verður hægt að kjósa til 12.febrúar. Nexpo-verðlaunin fara síðan fram í Bíó Paradís þann 15. febrúar klukkan 19. Taktu þátt á slóðinni visir.is/nexpo. Tengdar greinar: Flick My Life vefsíða ársins - almannatengill tók við verðlaununumTilnefningar til Nexpo-verðlaunanna 2011