Lax-á hefur söluna í Ásgarði

Lax-á, sem tók yfir Sogið fyrir Ásgarðslandi, er nú að hefja sölu laxveiðileyfa þar. Silungsveiðin hefst 1. apríl og salan er byrjuð.

Stefán Sigurðsson, sölustjóri hjá Lax-á, segir söluna í Ásgarð hafa byrjað síðastliðinn mánudag.

"Við erum strax búin að selja á milli 20 og 30 daga sem er nú bara ansi góð byrjun, Vorveiðin small inn á Agnið á þriðjudag og flugu strax nokkrir dagar út samdægurs," segir Stefán.

Eins og kunnugt er gengu Lax-ármenn frá kaupum á Ásgarði á nýliðnu ári. Aðspurður segist Stefán telja að verð veiðileyfanna sé á mjög svipuðu róli og svæðið kostaði í fyrra fyrir þá sem ekki voru félagsmenn í Stangaveiðifélagi Reykjavíkur - sem þá hafði haft Ásgarðinn á leigu um langt árabil.

"Svo það er engin dramantík í gangi," segir Stefán. "Núna ætla nýju eigendurnir að fínpússa húsið og gera það fínt fyrir 1. apríl, en þá hefst silungsveiðin."

Þess má geta að fram til 20. júní fylgir veiðihúsið í Ásgarði með silungasvæðinu. Þar eru þrjá stangir sem seldar eru saman á samtals 25.500 krónur. Verð á hverja stöng er þannig 8.500 krónur sem er það sama og stóð félagsmönnum Stangaveiðifélags Reykjavíkur til boða í fyrra. Utanfélagsmenn þurftu þá hins vegar að greiða 10.625 krónur fyrir stöngina. Eins og nú fylgdi veiðihúsið með í kaupunum í vorveiðinni í fyrra.