Samið við óstofnað félag

Skrifað hefur verið undir samkomulag við óstofnað félag kröfuhafa þrotabús Norðurturnsins ehf. um heildsöluleigu á tveimur hæðum Norðurturnsins.

Leigutakinn er Reginn A1, dótturfélag Regins hf. Fram kemur í tilkynningu til kauphallar að Byggingafélag Gylfa og Gunnars ehf. sé líka aðili að samkomulaginu. Félagið óstofnaða verður eigandi turnsins.

„Um er að ræða leigu á 1. og 2. hæð Norðurturnsins sem tengist Smáralind á báðum hæðum,“ segir í tilkynningunni. Samkomulagið er sagt háð fyrirvörum, þar á meðal um fjármögnun á byggingu turnsins.

„Reginn A1 mun í framhaldi framleigja allt rýmið til þriðja aðila, nú þegar hefur verið undirritað samkomulag við Baðhúsið ehf. um gerð leigusamnings á 2. hæð Norðurturnsins með tengingu og aðkomu inn í Smáralind á 2. hæð,“ segir í Kauphallartilkynningu Regins.

„Að mati Regins þá hefur ofangreint samkomulag og samningar ekki teljandi bein áhrif á afkomu félagsins, sem og er fjárhagsleg áhætta Regins lítil. Það er hinsvegar mat Regins að útleiga turnsins að hluta eða öllu leyti muni hafa mjög jákvæð áhrif á rekstur og starfsemi þeirra félaga sem starfandi eru í Smáralind.“