Landsbankinn gefur út skuldabréf og lækkar vexti á íbúðalánum

Landsbankinn hefur lokið fyrstu útgáfu sinni á sértryggðum skuldabréfum. Heiti útgáfunnar er LBANK CB 16 og eru bréfin óverðtryggð með föstum 6,30% vöxtum til þriggja ára. Samhliða útgáfunni lækkar Landsbankinn kjör á óverðtryggðum íbúðalánum með föstum vöxtum til 36 mánaða úr 7,50% í 7,30%.

Þetta kemur fram í tilkynningu frá bankanum. Þar segir að útgáfa sértryggðra skuldabréfa styðji við fjármögnun íbúðalánasafns bankans um leið og hún dregur úr fastvaxtaáhættu.

Fjárhæð útgáfunnar nemur 1.220 milljónum króna og þar af voru 1.160 miljónir seldar til fjárfesta á markaði. Sú upphæð sem eftir stendur verður nýtt til viðskiptavaktar vegna fyrirhugaðrar skráningar í Kauphöllinni.

„Þetta er mikilsverð viðbót við okkar fjármögnun og eftirspurn fjárfesta eftir sértryggðum skuldabréfum bankans sýnir að þeir telja stöðu Landsbankans sterka. Með útgáfunni breikkar Landsbankinn fjármögnun sína og hún gerir kleift að lækka vexti á óverðtryggðum íbúðalánum eins og til stóð. Landsbankinn hefur uppi fyrirætlanir um að gefa áfram út sértryggð skuldabréf og fyrstu viðbrögð lofa mjög góðu,“ segir Steinþór Pálsson bankastjóri Landsbankans í tilkynningunni.