Verðlaun afhent í HR

Ólafur Ragnar Grímsson, forseti Íslands, og Ari Kristinn Jónsson, rektor HR, afhentu í dag verðlaun Háskólans í Reykjavík fyrir framúrskarandi árangur í rannsóknum, kennslu og þjónustu.

Rannsóknarverðlaun HR í ár hlýtur Dr. Anna Ingólfsdóttir, prófessor við tölvunarfræðideild HR. Anna er forstöðumaður vísinda við ICE-TCS þekkingarsetur innan tölvunarfræðideildar HR og leiðir rannsóknarhóp um samsíða ferli. Rannsóknir hennar eru á sviði fræðilegrar tölvunarfræði, reiknilíkana og rökfræði í tölvunarfræði. Í tilkynningu frá HR segir að við val á rannsóknarverðlaunum HR sé litið til birtinga rannsókna á alþjóðlegum vettvangi, öflun styrkja, framlag til rannsóknarstarfs háskólans, áhrif á nemendur og unga rannsakendur og þátttöku í uppbyggingu rannsóknarsetra. „Það var mat nefndar eftir að tilnefningar lágu fyrir að Anna væri vel að verðlaununum komin enda hefði hún verið í fremstu röð vísindamanna Háskólans í Reykjavík í mörg ár. Hún hefur verið í efsta flokki í rannsóknarmati frá upphafi og hefur á síðustu fimm árum birt 53 ritrýndar greinar, átt þátt í níu styrkjum til skólans og hefur leiðbeint fimm nýdoktorum og þremur doktorsnemum," sagði Ari Kristinn Jónsson, rektor Háskólans í Reykjavík við athöfnina fyrr í dag.

Þá hlaut Halldór Halldórsson, dósent við tölvunarfræðideild HR, kennsluverðlaun HR. Halldór hefur kennt við háskólann í fjölda ára og átt stóran þátt í uppbyggingu hans. Halldór hefur einkum kennt línulega algebru, strjála stærðfræði, stöðuvélar og reiknanleika og tölulega greiningu. Nemendur HR senda inn tilnefningar til kennsluverðlauna en nefnd innan skólans ákvarðar hver hlýtur verðlaunin.

Handhafi þjónustuverðlauna HR árið 2013 er Guðrún Gyða Ólafsdóttir, móttökustjóri HR. Við val á handhafa þjónustuverðlauna var litið til gæða þjónustu, frumkvæðis, tengsla við starfsfólk og nemendur og niðurstöður úr þjónustukönnun.

Verðlaun HR eru veitt á hverju ári og er markmið með þeim að hvetja kennara og starfsfólk háskólans til nýsköpunar, þróunarstarfs, rannsókna og framúrskarandi þjónustu.