Atvinnuþátttaka hvergi meiri en hér á landi

Þátttaka á vinnumarkaði jókst um 0,1 prósentustig í löndum Efnahags- og framfarastofnunarinnar (OECD) milli fyrsta og annars fjórðungs þessa árs, samkvæmt nýbirtum tölum stofnunarinnar.

Atvinnustigið, eða hlutfall fólks á aldrinum 15 til 64 ára sem er við störf, var 65,1 prósent á öðrum fjórðungi. Hlutfallið er 1,4 prósentustigum undir því sem var fyrir hrun, á öðrum fjórðungi 2008.

Þróun atvinnustigsins er þó æði misjöfn eftir löndum og markaðssvæðum. Þannig er mest aukning milli fjórðunga 0,8 prósentustig í Ungverjalandi og á Íslandi. Næstmest aukning er í Tékklandi 0,5 prósentustig.

Þá er hlutfall fólks á vinnualdri sem er við störf hvergi hærra en hér á landi samkvæmt þessari nýjustu samantekt OECD, eða 80,8 prósent.

Ísland er þó lengra frá því en OECD löndin í heild að ná sama atvinnustigi og var fyrir hrun. Á öðrum fjórðungi 2008 var atvinnustigið 84,4 prósent hér á landi. Þar munar 3,6 prósentustigum.

Í löndum evrunnar varð 0,1 prósentustigs samdráttur í atvinnustigi milli fyrsta og annars ársfjórðungs í ár. Þróunin er þó misjöfn þar eftir löndum, féll til dæmis um 0,5 prósentustig í Ítalíu, en jókst um 0,2 prósentustig í Þýskalandi.