Hagnaður TM yfir hálfur milljarður á fyrsta ársfjórðungi

Hagnaður Tryggingamiðstöðvarinnar (TM)  á fyrsta ársfjórðungi ársins nam 522 milljónum kr. eftir skatta. Þetta er verulega betri afkoma en á sama tímabili í fyrra þegar hagnaðurinn nam 191 milljón kr.

Þetta kemur fram í tilkynningu til Kauphallarinnar en á stjórnarfundi í dag samþykkti stjórn og forstjóri TM fyrsta árshlutauppgjör félagsins 2013. Árshlutareikningurinn hefur hvorki verið endurskoðaður né kannaður af endurskoðendum félagsins.

„Við skilum góðum rekstrarniðurstöðum á fyrsta ársfjórðungi þar sem afkoma af vátryggingastarfsemi var betri en áætlanir gerðu ráð fyrir. Það hefur verið yfirlýst markmið okkar um árabil að bæta afkomu vátryggingastarfsemi TM þannig að hún standist samanburð við sambærileg norræn vátryggingarfélög. Rekstrarniðurstöður fyrsta ársfjórðungs, og raunar síðustu missera einnig, staðfesta að við erum komin vel á veg með þetta markmið okkar,“ segir Sigurður Viðarsson, forstjóri TM í tilkynningunni.

„Mjög hörð samkeppni ríkir á íslenskum vátryggingamarkaði og því er afkomubatinn ekki til kominn vegna hækkunar iðgjalda heldur fyrst og fremst vegna lægri tjónakostnaðar. Við höfum lagt ríka áherslu á forvarnir í samstarfi við viðskiptavini okkar auk þess sem allt áhættumat er í stöðugri þróun. Þessar áherslur eiga án efa drjúgan þátt í fækkun tjóna hjá viðskiptavinum og lægri tjónakostnaði félagsins. Það ber þó að hafa það í huga að hér er eingöngu um einn ársfjórðung að ræða og sveiflur geta verið töluverðar milli tímabila eins og reynslan hefur sýnt.”