Lærði að skjóta af byssu

Breska leikkonan Helena Bonham Carter fer með hlutverk hórumömmu í vestranum The Lone Ranger. Í viðtali við breska Vogue segist leikkonan hafa mjög gaman af því að undirbúa sig fyrir hlutverk og rýna í persónur sínar.

Bonham Carter kveðst hafa lært ýmislegt við leik sinn í The Lone Ranger. „Ég lærði að leika dömu frá Suðurríkjunum, mig hefur lengi langað að fara með slíkt hlutverk. Og ég lærði að skjóta af byssu. Maður upplifir sig skelfilega máttugan þegar maður skýtur af byssu. Því miður var það líka eitthvað sem ég lærði,“ sagði leikkonan sérvitra.

Bonham Carter er nú að undirbúa sig fyrir að leika Elizabeth Taylor í nýrri sjónvarpsmynd sem framleidd er að BBC.

„Ég fæ mest út úr rannsóknarstarfinu. Mamma mín er sálfræðingur og ég er lík henni að mörgu leyti. Mér finnst fátt skemmtilegra en að reyna að átta mig á persónu. Þegar öllu er á botnin hvolft, þá samþykki ég ekki að taka að mér hlutverk vegna þess að ég held að myndin muni slá í gegn, heldur af því að ég tel mig geta lært eitthvað frá persónunni.“