Fullyrðir að verðlag hafi lækkað

Verðbólguhraði hefur minnkað umtalsvert á undanförnum mánuðum samhliða styrkingu krónunnar, segir Þorsteinn Víglundsson, framkvæmdastjóri Samtaka atvinnulífsins. Hann segir það rangt, sem Gylfi Arnbjörnsson, framkvæmdastjóri ASÍ, fullyrðir að verðlag hafi ekki lækkað samhliða sterkara gengi krónunnar.

Þorsteinn bendir á að frá byrjun september á síðasta ári fram til loka febrúar hafi gengi krónunnar veikst um 13% sem hafi leitt til umtalsverðrar verðbólgu. Svipaða þróun hafi einnig mátt sjá veturinn 2011 til 2012 þar sem krónan hafi veikst talsvert og verðbólga fylgt í kjölfarið. „Með styrkingu yfir sumarmánuðina 2012 dró hins vegar verulega úr verðbólgu og mældist raunar verðhjöðnun tvo mánuði í röð, í júlí og ágúst í fyrra. Verðbólgu skotið nú varð minna en fyrir ári síðan og fátt bendir til annars en að það sé að ganga til baka með sama hætti og varð á síðasta ári," segir Þorsteinn. Hann segir því ljóst að fyrirtækin séu að skila gengisstyrkingu út í verðlagið og allar líkur séu á að hér verði mjög lágar verðbólgutölur í sumar haldist gengið stöðugt.

„Það veldur hins vegar áhyggjum að sjá hversu miklar sveiflur hafa verið á gengi krónunnar á þessum tíma, þrátt fyrir gjaldeyrishöft. Svo miklar sveiflur leiða til óhjákvæmilega til mikilla sveiflna í verðlagi líkt og raunin hefur orðið. Almennt virðist gert ráð fyrir að þessi óstöðugleiki haldi áfram. Flestar greiningardeildir gera þannig ráð fyrir að krónan veikist á nýjan leik er líður á haustið og Seðlabankinn hefur sjálfur varað við því að þjóðarbúið standi ekki undir erlendum skuldbindingum sínum við núverandi aðstæður,“ segir Þorsteinn.

Hann segir það því vera mikilvægt að ná tökum á þessum sveiflum í gengi krónunnar. Þær leiði til aukinnar verðbólgu, óstöðugs rekstrarumhverfis fyrir atvinnulífið og grafi undan kaupmætti almennings. „Mikill samhljómur hefur verið með Samtökum atvinnulífsins og Alþýðusambands Íslands hvað þetta varðar. Það er og verður áfram sameiginlegt verkefni okkar að stuðla að stöðugra efnahagsumhverfi hér á landi,“ segir Þorsteinn Víglundsson.