Upplifanir skipta máli

Á tímum ótakmarkaðs framboðs, aukinna netsamskipta og mikils áreitis hefur fólk enn takmarkaðri tíma, athygli og áhuga. Sama hvað verið er að selja og hvort sem verið er að höfða til íslenskra eða erlendra viðskiptavina duga hefðbundnar og fjöldaframleiddar markaðshugmyndir ekki lengur til. Til þess að heilla viðskiptavini þurfa þjónustu- og söluaðilar að sýna enn meiri frumleika og skapa einstakar upplifanir sem lifa í hugum fólks um ókomna tíð. Hefur sköpun upplifana aldrei skipt meira máli og í viðskiptaumhverfi samtímans er upplifunin sjálf kjarni markaðssetningar fyrirtækja.

Upplifana-hagkerfið ÍslandHagkerfi tuttugustu og fyrstu aldar hefur verið nefnt upplifana-hagkerfið og ver fólk meiri fjármunum en nokkru sinni fyrr í alls kyns upplifanir, hvort heldur sem er ferðalög, skemmtanir, menningarviðburði, matarmenningu, afþreyingu, vörur eða tækni. Það sem fólk velur fram yfir annað byggist á hversu jákvæða og einstaka upplifun viðskiptavinurinn öðlast við val sitt og þau fyrirtæki sem þrífast eiga viðskiptavini sem segja frá upplifun sinni vítt og breitt. Ísland í heild sinni er einn stór upplifana-rekstur sem sést vel á þeim fjölda ferðamanna sem hingað streyma til þess eins að fá að upplifa eitthvað einstakt og eftirminnilegt. Óskert og stórbrotin náttúran er okkar helsta „söluvara" þó svo við séum að bjóða upp á hana gjaldlaust og tekjuöflun tengist umgjörðinni í kringum hana. Íslendingar sjálfir eru þó kjarni verslunar og þjónustu í landinu og erum það við sem mest um það ræðum okkar á milli hvaða upplifun við höfum af hinu og þessu fyrirtæki og auglýsa Íslendingar gjarnan uppáhaldsfyrirtækin sín innan sem utan landsteinanna.

Er þitt viðskiptaframboð eftirminnilegt?Auðkenning, ímynd, útlit, umhverfi, vefsíður, merkingar og annað skiptir miklu máli þegar verið er að fanga athygli viðskiptavinarins. Ættu fyrirtæki aldrei að horfa fram hjá mikilvægi þess að nýta vel sjónræna skynjun þar sem hún er það fyrsta sem fólk metur. Sjónræn skynjun er þó aðeins fyrsta þrepið og þar á eftir byggist mat okkar á tilfinningalegri skynjun eða „upplifuninni" í heild sinni og þar skiptir frumleiki og mannlegt viðmót höfuðmáli. Þegar upplifunin staðfestir jákvæða sjónræna skynjun má segja að vel hafi tekist til. Af hverju veljum við eitt veitingahús fram yfir annað, eina prentþjónustu fram yfir aðra, eina vöru fram yfir aðra eða einn banka fram yfir annan? Þegar viðskiptaframboðið er í raun svipað sést glöggt að upplifunin er hin raunverulega söluvara. Hver er upplifun viðskiptavina þinna og hvernig gæti hún orðið enn stórfenglegri? Þegar upp er staðið, hvað ertu í rauninni að selja?