Græn framtíð hefur starfsemi á Álandseyjum

Græn framtíð hefur hafið samstarf við fyrirtæki á Álandseyjum um endurnýtingu á smáraftækjum. Um er að ræða tryggingafélög, fjarskiptafélög og söluaðila á raftækjum. Fyrirtækið hefur opnað starfsstöð á eyjunum í samstarfi við alþjóðlega góðgerðarfélagið Emmaus.

Í tilkynningu segir að Græn framtíð annist söfnun á gömlum og ónýtum smáraftækjum hjá viðkomandi aðilum á Álandseyjum og flytur til vottaðra endurnýtingarfyrirtækja í Evrópu. Þar er gert við tækin og þau seld að nýju, meðal annars til þróunarríkja, fyrir brot af upphaflegu verði.

Íhlutir ónýtra tækja eru nýttir til viðgerðar á eldri búnaði. Meðal búnaðar eru farsímar, fartölvur, spjaldtölvur, MP3 spilarar, myndavélar og önnur smáraftæki. Stefnt er að því að ljúka innleiðingu á söfnunarferli í mars og að Græn framtíð muni flytja fyrstu tækin frá Álandseyjum í byrjun sumars.

„Endurnýtingarkerfi Grænnar framtíðar hefur nú þegar sannað gildi sitt hér á Íslandi, Færeyjum og á Nýfundnalandi, en félagið endurnýtir stóran fjölda þess smáraftækja sem er ekki lengur í notkun í þessum löndum," segir Bjartmar Alexandersson framkvæmdastjóri Grænnar framtíðar í tilkynningunni.