Maórar draga lærdóm af reynslu Íslendinga

Maórar á Nýja Sjálandi leitast við að draga lærdóm af reynslu Íslendinga við stjórn sjávarútvegs og vinnslu sjávarafurða.

Te Putea Whakatupu sjóðurinn bauð Ögmundi Knútssyni, forseta viðskipta- og raunvísindasviðs Háskólans á Akureyri, til Waitangi á Nýja Sjálands, þar sem hann flutti fyrirlestur á ráðstefnu í gærmorgun.

Að sögn Ögmundar hefur Háskólinn á Akureyri átt í samstarfi við háskólann í Auckland á Nýja Sjálandi.

„Þeir hafa komið upp til okkar þrisvar sinnum. Og síðasta vor kom hópur frá maóra-samfélaginu, sem á 40 prósent af kvóta Nýsjálendinga, að skoða íslenskan sjávarútveg,“ segir hann.

Vandamál maóra virðist hins vegar svipuð og takast hafi þurft á við á Íslandi á milli áranna 1990 og 2000. „Það var ekki nógu mikil verðmætasköpun og menn voru fastir í lágverðs- og iðanaðarvörum.“

Í erindi sínu fór Ögmundur yfir þróunina í íslenskum sjávarútvegi frá því um 1990 og til dagsins í dag.

„Frá því að vera veiða- og framleiðsludrifinn sjávarútvegur yfir í að vera markaðsdrifinn sjávarútvegur og hvað það hefur þýtt fyrir okkur í aukinni verðmætasköpun, hvort sem það er í ferskum flökum eða aukaafurðum.“

Ögmundur segir aðstæður sjávarútvegs um margt svipaðar á Nýja Sjálandi og hér. Kvótakerfið sé byggt á sömu fyrirmynd og markaðir í Ástralíu séu í tveggja til tveggja og hálfs tíma fjarlægð með flugi, ekki ósvipað og Bretlandsmarkaður hér.

„Þetta eru önnur nöfn og aðrar tegundir, en umhverfið er raunverulega mjög svipað.“

Í dag fer Ögmundur til Auckland þar sem hann ræðir við háskólamenn næstu þrjá daga, áður en leiðin liggur til Malasíu þar sem hann heldur erindi. Hann er svo boðinn aftur til Nýja Sjálands í desember.

„Það er gaman að horfa til þess að útlendingar koma heim og hrífast af því sem við gerum og hversu mikil verðmæti okkur tekst að skapa úr sjávarafurðum.“

Á fréttavef Waatea news á Nýja Sjálandi er greint frá heimsókn Ögmundar. Þar er haft eftir Richard Jefferies, formanni Te Putea Whakatupu sjóðsins, að heilmikinn lærdóm megi draga af reynslu Íslendinga, bæði í umgengni við auðlyndina og uppbyggingu þekkingarklasa í rannsóknum og þróun.

Á ráðstefnunni í Waitangi komu einnig fulltrúar sjávarútvegsfyrirtækja frumbyggja í Kanada og Alaska, auk Maóra.