Veruleg aukning á hagnaði Vodafone milli ára

Hagnaður af rekstri Vodafone eftir skatta var 206 milljónir króna á fyrstu sex mánuðum ársins. samanborið við 56 milljónir króna á sama tímabili árið áður. Niðurstaðan er því umtalsvert betri en á sama tíma í fyrra.

Í tilkynningu segir að ástæður þessa góða árangurs eru nokkrar. Tekist hefur að hagræða verulega í rekstrinum og á tímabilinu tóku stefnumarkandi fjárfestingar undanfarinna ára að skila sér í lægri kostnaði og auknum tekjum. Viðskiptavinum í mikilvægum tekjuflokkum fjölgaði og fjarskiptanotkun jókst, samhliða auknum umsvifum fyrirtækja og vaxandi einkaneyslu. Þá hefur viðsnúningur orðið á starfsemi félagsins í Færeyjum.

Vegna aðstæðna í efnahagslífinu hafði ekki verið gert ráð fyrir tekjuaukningu milli ára, en með sértækum aðgerðum og markvissri aðlögun að krefjandi rekstrarumhverfi tókst að auka tekjurnar. Þær námu 6,5 milljörðum króna á tímabilinu og hækkuðu um 5% milli ára. Aukningin var mest í sjónvarpsþjónustu en þar nam hækkunin 19% milli ára. Tekjur af gagnaflutningsþjónustu hækkuðu um 17% og af farsímaþjónustu um 1%. Fastlínutekjur lækkuðu um 4% en ýmsar aðrar tekjur stóðu í stað.

"Við erum mjög ánægð með árangurinn á fyrri helmingi ársins og stolt af því að geta kynnt þessar niðurstöður. Þær gefa okkur byr í seglin og eru til merkis um einbeittan vilja starfsmanna til að skara fram úr," segir Ómar Svavarsson, forstjóri Vodafone í tilkynningunni.

„Við höfum á undanförnum misserum gripið til margvíslegra aðgerða sem hafa miðað að því að straumlínulaga félagið. Við höfum breytt skipulagi, fækkað starfsfólki ,breytt áherslum í rekstrinum og búið fyrirtækið undir framtíðina. Að sama skapi eru þetta jákvæðar fréttir í aðdraganda skráningar félagsins í Kauphöll Íslands, en að henni er stefnt á fjórða ársfjórðungi."