Um 200 milljóna hagnaður hjá MP - útlán vaxa um 56 prósent

Um 200 milljóna króna hagnaður varð af rekstri MP banka fyrstu 6 mánuði ársins fyrir skatta, samanborið við 681 milljóna króna tap árið 2011. Þetta kemur fram í fréttatilkynningu frá MP banka. Hagnaður eftir skatta nam 119 milljónum króna. Öll svið starfseminnar hafa vaxið umtalsvert á árinu, að því er segir í tilkynningu frá bankanum.

Heildareignir jukust um 43% á fyrri helmingi ársins og námu 71,9 milljörðum króna. Útlán hafa vaxið um 56% og námu 20,7 milljörðum króna. Innlán jukust jafnframt um 39% á fyrri árshelmingi og námu 51,1 milljörðum króna, að meðtöldum peningamarkaðsinnlánum.

„Lausafjárstaða bankans er sterk en bankinn átti 28,6 milljarða króna í handbæru fé eða ígildi þess við lok tímabilsins. Hækkunin frá áramótum nemur 147%.

Rekstrartekjur námu rúmlega 2 milljörðum króna. Hreinar vaxtatekjur á fyrri árshelmingi voru 851 milljón króna. Hreinar þóknanatekjur námu 623 milljónum króna og hreinar fjárfestingartekjur voru 324 milljónir króna. Hlutdeildarfélög skiluðu 217 milljóna króna hagnaði," segir í tilkynningu bankans.

Bankinn var endurfjármagnaður með aðkomu nýrra hluthafa, undir forystu Skúla Mogensen, í apríl í fyrra og eru rekstrartölur ekki samanburðarhæfar við fyrra ár fyrr en frá þeim tíma að telja, að því er segir í tilkynningu.

Upplýsingar um helstu rekstrartölur MP banka má sjá á vefsíðu bankans hér.