Erlend verðbréfaeign jókst um 126 milljarða

Íslenskir aðilar áttu 922 milljarða króna í erlendum verðbréfum um síðustu áramót. Erlend verðbréfaeign jókst um 125,5 milljarða frá árinu á undan.

Eign í skuldaskjölum nam 349,6 milljörðum króna í árslok 2011 sem er aukning um 117,2 milljarða króna frá árinu 2010. Seðlabanki Íslands segir að aukningu eignar í skuldaskjölum megi rekja að miklu leyti til fjárfestingar innlánsstofnanna í slitameðferð sem juku eignir sínar í skuldaskjölum um 79,2 milljarða milli áranna. Verðbréfaeign innlendra aðila í Lúxemborg dregst saman þriðja árið í röð og er komin niður í 99,8 milljarða króna sem er rúmlega þriðjungur af verðbréfaeign þar árið 2008.

Lífeyrissjóðir eru enn stærstu fjárfestarnir þrátt fyrir mikinn vöxt í erlendum eignum innlánsstofnana og innlánsstofnana í slitameðferð. Bandaríkjadalur er enn stærsti útgáfugjaldmiðill erlendra verðbréfa og flest erlend verðbréf í eigu innlendra aðila eru gefin út í Bandaríkjunum.