Rannsóknarskýrslu um lífeyrissjóði skilað á morgun

Skýrslu sérstakrar rannsóknarnefndar um starfsemi lífeyrissjóða fyrir hrun verður skilað á morgun klukkan 14:00 til forsvarsmanna Landssamtaka lífeyrissjóða. Hrafn Bragason, fyrrverandi Hæstaréttardómari og formaður rannsóknarnefndarinnar, staðfesti þetta við fréttastofu í morgun.

Hann sagði enn fremur að fréttatilkynning yrði sent út um þetta í dag, en fundur vegna afhendingu skýrslunnar fer fram á Grand Hóteli. Enginn forsvarsmanna lífeyrissjóðanna hefur fengið að sjá innihald skýrslunnar, og mun enginn fá að skoða hana fyrr en hún hefur formlega verið gerð opinber á fundinum á morgun.

Auk Hrafns eru Guðmundur Heiðar Frímannsson, siðfræðingur og prófessor við Háskólann á Akureyri og Héðinn Eyjólfsson, viðskiptafræðingur, í rannsóknarnefndinni.