Bætir ekki andrúmsloftið í viðræðunum

Steingrímur J. Sigfússon segir þátttöku framkvæmdastjórnar Evrópusambandsins í Icesave málinu pólitískt mál þar sem sambandið taki afstöðu gegn Íslandi. Honum þyki þetta fruntaleg framkoma sem sé ekki til þess fallin að bæta andrúmsloftið í aðildarviðræðunum.

Framkvæmdastjórn Evrópusambandsins hefur farið fram á það að taka þátt í málarekstri ESA gegn Íslandi vegna Icesave. Þetta þýðir að framkvæmdastjórnin mun styðja ESA í málinu. Efnahags- og viðskiptaráðherra segir þetta ekki koma sér á óvart.

„Auðvitað er þetta líka pólitískt mál og Evrópusambandið gengur þarna formlega í lið og tekur afstöðu gegn Íslandi og það er auðvitað pólitískt mál sem að ég verð að segja að Evrópusambandið hefði vel mátt láta vera mín vegna. Mér finnst það býsna fruntalegt að láta sér ekki nægja þá að einstök aðildarríki, eins og kannski Bretar og Hollendingar, sem við bjuggum okkur alveg undir að myndu reyna að fara inn í málið að þeir geri það, en að Evrópusambandið sem blokk skuli stilla sér svona upp það finnst mér býsna svert pólitískt og það svona bætir ekki stemminguna svo vægt sé til orða tekið," segir Steingrímur.

Þegar eiga Íslendingar í deilum við Evrópusambandið um makrílveiðar. Steingrímur segir að reyna muni á það á næstu vikum hvort að sú deila tefji fyrir því að sjávarútvegskaflinn opnist.

„Ef það gerist þá verður það í viðbót mjög alvarlegur atburður og þá er komið einn eitt korn í mælinn."

Steingrímur segir andrúmsloftið skipta miklu máli í aðildarviðræðum Íslendinga og Evrópusambandsins.

„Að menn séu að ræða saman í góðri trú og af velvild. Ef að ítrekað kemur til hluta af hálfu Evrópusambandsins sem að við hljótum að túlka sem ákveðna andstöðu þeirra þá hefur það áhrif á andrúmsloftið. Það hlýtur öllum að vera það ljóst. Það fækkar væntanlega í svona fáliðuðu vinabandalagi þeirra hér," segir hann að lokum.