Olíuvinnslu Noregs við Jan Mayen verði þjónað frá Íslandi

Fyrirtækin sem nú undirbúa þjónustumiðstöð á Íslandi vegna olíuborana stefna að því að hún þjóni einnig fyrirhugaðri olíuleit Norðmanna á Jan Mayen-hryggnum. Þórshöfn og Vopnafjörður koma enn til greina.

Ráðamenn breska fyrirtækisins Asco telja að fyrsti borpallurinn geti verið kominn á Drekasvæðið eftir tvö til þrjú ár og eru, í samstarfi við Olíudreifingu, þegar byrjaðir að leggja drög að þjónustumiðstöð á Íslandi með gerð viljayfirlýsingar í vikunni um hafnirnar á Akureyri, Húsavík og Reyðarfirði.

Fram kom í fréttum Stöðvar 2 í gær að þeir eru einnig með í huga að geta þjónað olíuiðnaði við Austur-Grænlands frá Íslandi og þá segir Hörður Gunnarsson, framkvæmdastjóri Olíudreifingar ehf. að markmiðið sé einnig að þjónusta þá olíuleit og vinnslu sem Norðmenn áforma við Jan Mayen. Tvö ár eru frá því norsk stjórnvöld hófu af krafti undirbúning olíuleitar á sínum hluta Jan Mayen-hryggjarins en um leið friðlýstu þau eyjuna Jan Mayen, sem gæti tryggt Íslandi allan þjónustuþáttinn.

En hvað ræður vali á þjónustuhöfn? Lengd siglingaleiðar skiptir þar mestu, segja fulltrúar Olíudreifingar og Asco, svo fremi að aðrar forsendur séu til staðar; góð hafnaraðstaða og margskyns þjónusta, eins og hótelrými fyrir starfsmenn.

Sú spurning vaknar hvort staðir eins og Þórshöfn og Vopnafjörður séu of litlir til að þjónusta olíuleit?

Svo þarf ekki að vera, segir Runar Hatletvedt, yfirmaður Asco í Norður-Evrópu, í viðtali á Stöð 2 og segir norðurausturhornið ekki útilokað. Hörður segir að Asco-menn eigi eftir að koma aftur til landsins og rætt verði við fulltrúa sveitarfélaga eins og Vopnafjarðar.