Traust fjármálamarkaða á Ísland eykst

Ísland heldur áfram að falla niður lista CMA gagnaveitunnar um skuldatryggingaálög þjóða heimsins, sem er jákvæð þróun.

Ísland er nú komið niður í 19. sæti listans en lengi eftir hrunið haustið 2008 var Ísland í hópi þeirra tíu þjóða sem talin var mest hætta á að lentu í þjóðargjaldþroti og fór hæst í fjórða sæti listans.

Þetta kemur fram í ársfjórðungsskýrslu CMA yfir fyrsta ársfjórðung ársins. Ísland bætir stöðu sína um eitt sæti á listanum frá fjórða ársfjórðungi í fyrra. Skuldatryggingaálag Íslands stendur í 260 punktum og er tvöfalt lægra en álag Spánar. Raunar er Spánn kominn í fyrsta sinn í hóp þeirra tíu þjóða sem taldar eru í hvað mestri hættu á þjóðargjaldþroti. CMA telur 32% líkur á slíku.

Hinsvegar er Grikkland dottið út af lista CMA yfir verst stöddu þjóðirnar eftir þá endurskipulagningu sem varð á skuldum landsins fyrr í vetur. Nýtt land kemur í staðinn inn í toppsætið en það er Kýpur með álag upp á tæplega 1.200 punkta.

Noregur er sem fyrr það land sem flestir treysta best en skuldatryggingaálag Noregs er komið niður í 22 punkta.