Sjampóbrúsarnir rugla fíkniefnahundana í ríminu

Hluti efnanna sem Pólverjarnir þrír reyndu að smygla hingað til lands á sunnudagsmorgun var falinn í sjampóbrúsum, líkt og 187 grömm af kókaíni sem fundust í Leifsstöð 6. apríl síðastliðinn.

Ekki er þó talið að málin tvö tengist. Maðurinn sem tekinn var með kókaínið var að koma frá London, er íslenskur og auk þess þykir það benda til þess að málin séu ótengd að efnin hafi ekki verið þau sömu. Hæstiréttur staðfesti á mánudag varðhaldsúrskurð yfir kókaínsmyglaranum til föstudagsins næsta.

Annar maður var handtekinn í flugstöðinni vegna málsins. Fram kemur í niðurstöðu Hæstaréttar að lögregla beri nú saman framburð mannanna og ýmislegt bendi til þess að málið kunni að vera umfangsmeira en virst hafi í fyrstu.

Samkvæmt upplýsingum Fréttablaðsins er nokkuð algengt að smygla fíkniefnum til landsins földum í sjampóbrúsum. Í þeim sé gjarnan lykt sem geti ruglað leitarhunda í ríminu og auk þess geti það blekkt gegnumlýsingartæki að hafa duftmassa í slíku íláti.