Nýherji efnir til ráðstefnu í tilefni afmælis

Talið er að um 79% smærri og meðalstórra fyrirtækja muni nota að minnsta kosti eina tölvuskýþjónustu árið 2014. Þetta er á meðal þess sem fram kemur á 20 ára afmælisráðstefnu sem Nýherji efnir til á fimmtudaginn kemur.

Í tilkynningu segir að á ráðstefnunni verði meðal annars svarað spurningum á borð við hvað nákvæmlega er tölvuský, hver er ávinningurinn af tölvuskýjum og hverjar eru áhætturnar? Hvað þarf að hafa í huga við hagnýtingu tölvuskýja?

Það er Helgi Björgvinsson, lausnaráðgjafi hjá Nýherja, sem leitar svara í erindi sínu á 20 ára afmælisráðstefnu Nýherja, sem haldin verður 3. maí næstkomandi.

"Áhugi fyrirtækja á að nýta sér tölvuský fer stöðugt vaxandi. Flest fyrirtæki og einstaklingar nota skýþjónustu, oft án þess að gera sér grein fyrir að um ský sé að ræða. Sem dæmi um skýþjónustu sem flestir þekkja má nefna Gmail og Facebook," segir Helgi.

"Um 79% smærri og meðalstórra fyrirtækja hyggjast nýta sér tölvuskýþjónustu árið 2014, að því er fram kemur í könnun sem var framkvæmd á vegum Microsoft. Slíkur vöxtur er meðal annars drifinn áfram af þeim ávinningi sem fyrirtæki sjá í lægri fjárfestingum og auknum sveigjanleika. Fyrirtæki verða hins vegar að fara rétta leið; vita hvað ber að varast og hvernig best sé að njóta þess ávinnings sem tölvuský geta haft í för með sér."

Ráðstefnan fer fram á Hilton Reykjavik Nordica frá 13-17 þann 3. maí.