Héraðsdómur varð ekki við kröfu Ragnars Hall

Héraðsdómur Reykjavíkur varð ekki við kröfu Ragnars H. Hall hrl. um að slitastjórn Frjálsa fjárfestingarbankans hf., ætti að segja af sér. Úrskurður þess efnis féll í Héraðsdómi Reykjavíkur 22. maí sl. en það var Ingveldur Einarsdóttir héraðsdómari sem komst að þessari niðurstöðu.

Ragnar taldi slitastjórnina hafa ekki staðið sig sem nægilega vel í starfi sínu, þegar kom að því að greiða úr málum fólks, sem eru umbjóðendur Ragnars, og áttu hagsmuni að gætu hjá Frjálsa fjárfestingarbankanum. Taldi hann vinnu slitastjórnarinnar hafa gengið alltof hægt og vinnubrögð slitastjórnarinnar ámælisverð.

Í úrskurðarorðum héraðsdóms, sem fréttastofa hefur undir höndum, kemur fram að eftir að sjónarmið deiluaðila höfðu verið rædd, og gögnum komið til dómara, hafi það verið hans mat að ekki stæðu efni til þess að víkja slitastjórninni frá.

Fundur var haldinn 11. maí með lögmönnum beggja, og síðan bárust bréf frá báðum, 18. og 21. maí, sem dómari tók tillit til. Hann komst síðan að niðurstöðu 22. maí, eins og áður segir.

Orðrétt segir í úrskurði héraðsdóms, um fundahöldin og síðan niðurstöðu héraðsdóms:  „Á fundinum reifuðu lögmenn beggja aðila sjónarmið sín og lögðu fram gögn til skoðunar. Að því loknu óskaði dómari eftir afstöðu lögmanns kröfuhafa til þess hvort hann héldi fast við kröfu sína um að slitastjórn yrði vikið frá og óskaði lögmaðurinn eftir því að láta uppi afstöðu sína til þess síðar í vikunni. Með bréfi 18. maí sl., barst dóminum bréf lögmannsins þar sem sjónarmið hans eru reifuð enn frekar. Þá barst dóminum bréf slitastjórnar Frjálsa fjárfestingabankans hf., 21. maí sl., þar sem fram koma sjónarmið slitastjórnar. Að virtum þeim skýringum sem fram komu á ofangreindum fundi sem haldinn var 11. maí sl., og þeim gögnum sem þá voru lögð fram til skoðunar fyrir héraðsdómara og lögmann kröfuhafa, verður ekki fallist á kröfu lögmanns kröfuhafa um að víkja slitastjórn frá og skipa nýja menn í hennar stað.“