Hagnaður Íslandsbanka nam 5,6 milljörðum

Fyrsta árshlutauppgjör Íslandsbanka á árinu var birt í dag.

Eigið fé bankans nam 129,4 milljörðum í lok tímabilsins og hækkaði um 5% á ársfjórðungnum. Eiginfjárhlutfall var 23,3% í lok tímabilsins, sem er töluvert umfram það 16% lágmark sem FME setur bankanum.

Heildareignir við lok fjórðungsins námu 792,4 milljörðum, samanborið við 795,9 milljarða í árslok 2011 og heildarinnlán 509,3 milljörðum, samanborið við 525,8 milljarða í árslok 2011.

Hagnaður eftir skatta var 5,6 milljarðar samanborið við 3,6 milljarða á fyrsta ársfjórðungi 2011.

Nettó gjaldfærsla vegna endurmats lánasafnsins nam 1,5 milljarði á fjórðungnum, samanborið við gjaldfærslu upp á 664 milljónir á sama tímabili í fyrra.

Birna Einarsdóttir, bankastjóri Íslandsbanka, segir bankann koma sterkan út úr þessum fyrsta ársfjórðungi og lýsir stolti af starfsfólki bankans og þeirri jákvæðni og elju sem það hefur sýnt. „Eigið fé bankans er vel yfir lágmarks kröfum eftirlitsaðila og hagnaður af reglulegri starfsemi hefur styrkst."

Hún segir aukna eftirspurn eftir útlánum en telur óvissu sem gengislánadómarnir hafa skapað óheppilega fyrir þjóðina alla.