Söluferli Iceland Foods framlengt

Félögin tvö sem sögð eru hafa átt hæsta boð í Iceland verslunarkeðjuna hafa bæði farið fram á fresti til þess að gera frekari áreiðanleikönnun á fyrirtækinu. Því mun dragast að gefið verði út hver átti hæsta boðið í keðjuna.

Þetta er fullyrt á vefsíðu Wall Street Journal í dag og vísað í Dow Jones fréttaveituna. Félögin tvö, BC Partners og Bain Capital eru sögð hafa boðið á bilinu 1,4 til 1,5 milljarða punda í keðjuna í lok síðasta mánaðar.

Búist hafði verið við því að Skilanefndir Landsbankans og Glitnis myndu gefa það út fyrir síðustu mánaðarmót hvor aðilinn hefði átt hæsta boðið en það mun nú dragast enn frekar að tilkynnt verði um það, ef marka má frétt Wall Street Journal.