Langtímaatvinnulausum fækkar um 1.100 manns

Langtímaatvinnulausum fækkaði um 1.100 manns á öðrum ársfjórðungi ársins miðað við sama tímabil í fyrra.

Þetta kemur fram á vefsíðu Hagstofunnar. Þar segir að þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir.

Á öðrum ársfjórðungi í ár höfðu um 2.800 manns verið atvinnulausir svo lengi eða 21,2% atvinnulausra. Á öðrum ársfjórðungi í fyrra voru þeir sem höfðu verið atvinnulausir ár eða lengur um 3.900 manns eða 24,7% atvinnulausra.