Áhyggjuefni að lágt gengi slær ekki á innflutning til landsins

Greining Arion banka segir það vera áhyggjuefni að veiking krónunnar hafi ekki meiri áhrif á innflutning til landsins, hvort sem er í formi vara eða utanlandsferða.

Í nýjum tölum Hagstofunnar kemur fram að innflutningur jókst um 5,7% milli ára á fyrsta ársfjórðungi þessa árs þegar tekið hefur verið tillit til verðbólgu. Hinsvegar hefur gengi krónunnar lækkað talsvert á tímabilinu.

Fjallað er um málið í Markaðspunktum greiningarinnar. Þar segir að það liggi fyrir að þrátt að samdráttur hafi verið mikill í innflutningi fyrst eftir hrun þýði það ekki að nú sé aukið svigrúm til innflutnings.

„Íslenskt hagkerfið þarf á gjaldeyristekjum að halda og áframhaldandi aukning í innflutningi étur upp þann gjaldeyri sem við þó sköpum. Í því samhengi má benda á að Íslendingar eyddu í fyrra rúmlega þeim gjaldeyri sem útlendingar eyddu hér á landi, þrátt fyrir að um 40% ferðamanna í gegnum Leifsstöð hafi verið Íslendingar á móti 60% útlendingum," segir í Markaðspunktunum.