Fyrirsjáanlegt að afkoma búanna skerðist

Viðbúið er að afkoma íslenskra svínabænda verði lakari, komi til aðildar Íslands að Evrópusambandinu. Þetta kemur fram í nýrri skýrslu sem Hagfræðistofnun Háskóla Íslands gerði fyrir Svínaræktarfélag Íslands, um stöðu og horfur í svínarækt.

Skýrslan gerir ráð fyrir að afurðaverð til bænda gæti orðið um 39 prósentum lægra eftir aðild, að undanskildum styrkjum og mótvægisaðgerðum, og mikill samdráttur geti orðið á framleiðslu, vegna aukins innflutnings á svínaafurðum.

Á móti kemur að fjármagnskostnaður svínaframleiðenda gæti lækkað um 37,5 prósent til lengri tíma litið. Miðað við forsendur skýrslunnar er gert ráð fyrir að samdráttur á afkomu svínaframleiðenda geti numið á bilinu 600 til 1.000 milljónum króna og miðað við reynslu Finna gæti kostnaður ríkissjóðs af því verið á bilinu 400 til 750 milljónir árlega.

„Það er engin búgrein á Íslandi sem getur reiknað með að koma betur út, fjárhagslega eftir aðild," segir Daði Már Kristófersson, annar höfunda skýrslunnar, „en svínaræktin stendur ekki verst."

Daði kveðst ekki telja að svínarækt myndi leggjast af undir slíkum aðstæðum en án stuðnings yrði staðan erfið. Hörður Harðarson, formaður Svínaræktunarfélagsins, segir að skýrslan sé gerð til að skýra stöðu greinarinnar og hvað þurfi til að hún geti þrifist við breyttar aðstæður.

„Það má segja að boltinn sé nú hjá stjórnvöldum til að vega og meta hvaða hlutverki þessi grein á að gegna hér á landi til lengri tíma."

- þj