Vill að Samkeppniseftirlitið skoði verðlagningu olíufélaganna

Olíufélögin hafa sætt færis og lætt inn hækkunum á álagi sínu á bensín samhliða hækkunum á heimsmarkaðsverði og skattahækkunum. Þetta segir formaður Félags íslenskra bifreiðaeigenda sem villl að Samkeppniseftirlitið skoði hvort að ekki óeðlilegt að verðmunur á milli olíufélaga sé aðeins þrjátíu aurar.

Bensínið hefur aldrei verið dýrara en nú. Í gær hækkuðu olíufélögin verð sitt enn eina ferðina og kostar bensínlítrinn nú að meðaltali 246 krónur en lítrinn af dísel 253 krónur. Á aðeins mánuði hefur verð á bensín lítranum hækkað um átján krónur. Hækkanirnar má rekja til hærra heimsmarkaðsverðs og hærri skatta á eldsneyti.

„Við erum að horfa í það að skattar á hvern bensínlítra hafa hækkað um 55% frá því að ríkisstjórn Jóhönnu Sigurðardóttur tók við fyrir þremur árum og það er nú ansi ríflegt," segir Runólfur Ólafsson.

Þá telur hann að hækkanirnar megi einnig rekja til þess að olíufélögin hafi heldur bætt í álagningu. „Það er eins og menn séu að læða inn einhverri krónu eða tveimur með þessum skattahækkanir og hækkunum erlendis. Til að mynda á sama tíma og við erum að horfa yfir hér, það er janúarmánuð, þá hefur eldsneytisverð í Danmörku hækkað um það bil þremur krónum minna að teknu tilliti til skattabreytinganna," segir Runólfur.

Runólfur segir FÍB undirbúa erindi til Samkeppniseftirlitisins. Félagið vill að álagning olíufélaganna verði skoðuð þar sem verðmunur á milli þeirra hafi aldrei verið minni en um þessar mundir. „Það virðist vera orðin bara nánast regla að það er ekki mikið meira en þrjátíu aura munur á milli svona algengasta verðs og lægsta verðs á markaði. Þrjátíu aurar miðað við núverandi aðstæður eru á milli 0,1 og 0,15 prósent það er bara mjög óeðlilega lítill verðmunur. Ég þekki hvergi til svona lítils verðmunar í nágrannaríkjum okkar. Þannig að við skorum á Samkeppnisyfirvöld að skoða þetta sérstaklega," segir Runólfur.