Hækkunin skilar 2,5 milljörðum í ríkissjóð

Fjármálaráðherra segir að stjórnvöld geri ráð fyrir að virðisaukaskattur á ferðaþjónustu verði hækkaður í fjárlögum fyrir næsta ár, en hækkunin á að skila tveimur og hálfum milljarði til viðbótar í ríkissjóð. Formaður gistináttanefndar Samtaka ferðaþjónustunnar segir hækkunina fráleita.

Oddný Harðardóttir fjármálaráðherra, fundaði með Samtökum ferðaþjónustunnar, í dag en til umræðu á fundinum voru fyrirhugaðar skattahækkanir stjórnvalda, en eins og greint hefur verið frá í fréttum Stöðvar 2 hyggjast stjórnvöld hækka virðisaukaskatt á gistiþjónustu, úr 7 prósent í 25,5 prósent, en þessi hækkun á að skila 2,5 milljarði króna í ríkisskassann. Lokaákvarðanir um þetta verða þó ekki teknar fyrr en fjárlög verða endanlega afgreidd á Alþingi í haust.

Oddný Harðardóttir, fjármálaráðherra, segir að stjórnvöld muni halda þessu til streitu, ekki síst þar sem ferðaþjónustan hafi verið á undanþágu í nokkurn tíma hvað varðar virðisaukaskattinn.

„Núna er mikill vöxtur í greinninni og því engin ástæða til að hún vaxi á undanþágu umfram aðrar greinar. Við reiknum með þessum tekjum í drögum að fjárlagafrumvarpi, við erum að skoða þessi mál með hagsmunaðilum," segir hún.

Steinþór Jónsson, formaður gistináttanefndar Samtaka ferðaþjónustunnar og einn þeirra sem sat fundinn með ráðherra í dag, segir fyrirhugaða skattahækkun vera fráleita og komi til með að skaða ferðaþjónustuna verulega. Tekjur í ríkissjóð myndu alls ekki aukast með hækkuninni og að greinin gæi alls ekki meðtekið þessa hækkun.