Greiðslur til erlendra kröfuhafa lækka gjaldeyrisforðann

Greiðslur til erlendra kröfuhafa gömlu bankanna leiddu til þess að gjaldeyrisforði þjóðarinnar lækkaði umtalsvert í síðasta mánuði.

Gjaldeyrisforði Seðlabankans nam um 786,2 milljörðum kr. í lok ágúst og lækkaði um 43,5 milljarða kr. milli mánaða. Hreinn gjaldeyrisforði, þ.e. erlendar eignir að frádregnum erlendum skammtímaskuldum, nam um 458,2 milljarða kr. í lok ágúst.

Nettóútgreiðslur gjaldeyriseigna Seðlabankans og ríkissjóðs fyrir næstu 12 mánuði eru áætlaðar um 328 milljarðar kr.

Þetta kemur fram á vefsíðu Seðlabankans. Þar segir að lækkun gjaldeyrisforðans í ágúst skýrist annarsvegar af samningsbundnum afborgunum lána frá Alþjóðagjaldeyrissjóðnum upp á um 13 milljarða kr. og hinsvegar af lækkun á gjaldeyrisreikningum fjármálafyrirtækja í slitameðferð upp á um 33,6 milljarða kr.