AGS kallar eftir aðhaldssamari hagstjórn

Alþjóðagjaldeyrissjóðurinn hvetur til þess að stjórnvöld sýni meira aðhald í ríkisfjármálum og telur réttast að Seðlabankinn hækki stýrivexti vegna aukins verðbólguþrýstings. Þá telur sjóðurinn að gengi krónunnar gæti enn veikst nokkuð á næstunni. Þetta er meðal þess sem kemur fram í skýrslu AGS um íslenskt efnahagslíf sem kom út í síðustu viku en stofnunin gefur reglulega út slíkar skýrslur.

Í skýrslunni kemur fram að Ísland sé hægt og bítandi að rétta úr kútnum eftir bankahrunið árið 2008. Til marks um það hafi hagvöxtur verið rúm 3 prósent á síðasta ári, knúinn af einkaneyslu og aukinni fjárfestingu. Þá hafi dregið úr atvinnuleysi en verðbólga sé þó enn of mikil.

Eins og áður sagði leggur AGS til í skýrslunni að stjórnvöld grípi til frekari aðhaldsaðgerða í ríkisfjármálunum. Nánar tiltekið að stjórnvöld dragi úr útgjöldum hins opinbera um sem nemur hálfu prósenti af landsframleiðslu. Kallar AGS eftir þessum aðgerðum þar sem ríkisútgjöld hafi verið meiri á árinu en búist hafi verið við.

Þá telur AGS að þrátt fyrir að krónan sé að öllum líkindum nokkuð undir jafnvægisraungengi sínu sé líklegt að gengið veikist enn frekar á næstunni. Það skýrist af þrýstingi vegna framvindu áætlunar um losun gjaldeyrishafta auk þess sem endurgreiðslur íslenskra fyrirtækja á erlendum skuldum hafi áhrif.

Loks kallar AGS eftir frekari aðgerðum við endurskipulagningu skulda heimila og fyrirtækja þótt sjóðurinn leggi áherslu á að mikill árangur hafi náðst. Þá hvetur hann til frekari aðgerða til að styrkja eftirlit með fjármálakerfinu og draga úr veikleikum.- mþl