Aukinn þorskkvóti þýðir 400 milljónir í gjaldeyristekjur á mánuði

Verði þorskkvótinn stækkaður um 10% á næsta fiskveiðiári, eins og flest bendir til, gæti sú aukning skilað þjóðarbúinu tæplega hálfu prósenti í auknum hagvexti.

Útflutningsverðmæti þorsks nam 77 milljörðum kr. í fyrra og var ríflega 30% af heildarútflutningsverðmæti sjávarafurða á árinu.

Greining Íslandsbanka hefur reiknað út hagnaðinn af því að auka kvótann úr núverandi 177 þúsund tonnum og upp í 195.000 tonn eða um 10%. Gjaldeyristekjurnar af aukningunni yrðu hátt í sjö milljarðar króna á fiskveiðiárinu eða sem jafngildir tæpu hálfu prósenti af landsframleiðslunni. Þetta kemur fram í Morgunkorni greiningarinnar.

Með öðrum orðum þýðir slík aukning u.þ.b. 400 milljónir kr. í hreinum gjaldeyristekjum á mánuði að jafnaði. Sú upphæð er hátt í tvöfalt það fé sem Seðlabankinn eyðir í gjaldeyriskaup í hverri viku til að styrkja gjaldeyrisforða landsins.