Fréttaskýring: 150 milljarða hagnaður frá hruni

Stóru viðskiptabankarnir þrír, Landsbankinn, Arion banki og Íslandsbanki, hafa hagnast samtals um 150,3 milljarða króna frá því að þeir voru stofnsettir í október 2008. Þorri þess hagnaðar er vegna uppfærslu á virði eigna sem þeir tóku við frá fyrirrennurum sínum eftir bankahrunið. Íslandsbanki hefur hagnast mest á tímabilinu, eða um 57,7 milljarða króna. Þar af nam samanlagður hagnaður þeirra á síðasta ári 29,9 milljörðum króna. Þetta kemur fram í ársreikningum bankanna þriggja sem birtir voru á síðastliðnum dögum.

Hagnaðurinn er ekki í líkingu við það sem hann var á árunum fyrir bankahrun þegar gömlu viðskiptabankarnir þrír, Kaupþing, Glitnir og Landsbanki Íslands, sögðust hafa hagnast um 137,6 milljarða króna á árinu 2007 og 163,7 milljarða króna árið 2006.

Allir stóru bankarnir þrír hafa áætlað kostnað við endurreikning gengislána í kjölfar gengislána í febrúar síðastliðnum. Útreikningarnir byggja á sviðsmyndum sem Fjármálaeftirlitið (FME) hefur teiknað upp vegna dómsins. Samtals færðu Landsbanki (38 milljarðar króna), Arion banki (13,8 milljarðar króna) og Íslandsbanki (12,1 milljarður króna) niður eignir sínar um 63,9 milljarða króna vegna dómsins.

Um miðjan mars heimilaði Samkeppniseftirlitið fjármálafyrirtækjum landsins að hafa með sér afmarkað samstarf sem miðar við að hraða úrvinnslu skuldamála sem varða gengisbundin lán vegna dóms Hæstaréttar 15. febrúar síðastliðinn. Samkvæmt upplýsingum Markaðarins hafa farið fram nokkrir fundir en skilyrðin fyrir samstarfinu talin það hamlandi að þeir hafi skilað litlu sem engu.