Bandarískt lyfjafyrirtæki vill kaupa Actavis

Talið er að bandaríska lyfjafyrirtækið Watson Pharmaceuticals Inc. ætli að kaupa Actavis. Fréttastofan Reuters greinir frá þessu í dag en talið er að kaupvirðið sé um 7 milljarðar dollara.

Watson er nú þegar á meðal stærstu lyfjafyrirtækja veraldar. Fyrirtækið er sagt hafa yfirgripsmikla þekkingu á innviðum Actavis en fyrrverandi stjórnandi í Actavis, Sigurður Óli Ólafsson, hefur unnið fyrir Watsons frá því í september árið 2010.

Hvorki Watson, Actavis né Deutsche Bank hafa tjáð sig um málið.

Samkvæmt Reuters mun Watson greiða 5 til 5.5 milljarða evra fyrir Actavis. Á síðasta ári færði Actavis rekstur sinn frá Íslandi til Zug í Sviss.

Á síðustu árum hefur Watson reynt að auka umsvif sín í Evrópu. Fyrirtækið keypti gríska lyfjafyrirtækið Specifar Pharmaceuticals á síðasta ári fyrir 562 milljón dollara. Stærstu kaup Watsons voru þó árið 2009 en þá keypti fyrirtækið Arrow Group fyrir rúma 1.75 milljarða dollara.

Talið er að Watsons sjái færi á aukinni samvirkni fyrirtækisins með kaupunum á Actavis. Jafnframt gæti Watson lokað nokkrum verksmiðjum sínum í Bandaríkjunum í kjölfar kaupanna.