Mesti fjöldi kaupsamninga um fasteignir frá hruninu

Alls var 131 kaupsamningi um fasteignir þinglýst á höfuðborgarsvæðinu í síðustu viku og hefur fjöldi þeirra aldrei verið meiri í einni viku frá því fyrir hrunið haustið 2008.

Þetta eru 26 fleiri samningar en nemur meðaltalinu á viku undanfarna þrjá mánuði sem er 105 samningar.

Heildarveltan var 4,2 milljarðar króna sem er 1,2 milljörðum kr. meiri velta en nemur meðaltalinu á undanfarna þrjá mánuði.

Meðalupphæð á samning var rúmlega 32 milljónir króna sem er tæpum 3 milljónum króna hærri upphæð en nemur fyrrgreindu meðaltali á viku.