Eimskip er metið á allt að 45 milljarða

Hlutabréf í Eimskip verða tekin til viðskipta í byrjun næsta mánaðar. Skráningarlýsing liggur fyrir á næstu dögum. Verðbil í útboði verður 205 til 225 krónur. Tuttugu prósent verða seld til fagfjárfesta og þrjú til fimm prósent til almennings.

Hlutabréf í Eimskip verða tekin til viðskipta í Kauphöllinni fyrri hluta nóvembermánaðar, samkvæmt heimildum Fréttablaðsins. Fyrst verður 20 prósenta hlutur seldur til fagfjárfesta í lokuðu útboði þar sem verðbilið verður 205 til 225 krónur á hlut. Lokagengið mun síðan ráðast af þeim tilboðum sem berast í hlutinn. Í kjölfarið á að selja þriggja til fimm prósenta hlut í almennu útboði. Skráningarlýsing verður birt á allra næstu dögum.

Miðað við verðbilið er heildarvirði útgefins hlutafjár í Eimskip 41 til 45 milljarðar króna. Þrotabú Landsbanka Íslands mun selja 20 prósenta hlut en aðrir hluthafar, meðal annars Straumur fjárfestingabanki, munu selja það sem upp á vantar. Heimildir Fréttablaðsins herma að bandaríski fjárfestingasjóðurinn Yucaipa ætli sér ekki að selja stóran hlut að þessu sinni.

Eimskip gekk í gegnum fjárhagslega endurskipulagningu eftir bankahrunið. Í kjölfar hennar urðu helstu eigendur félagsins þrotabú Landsbankans og bandaríski fjárfestingasjóðurinn Yucaipa. Stjórn Eimskips ákvað í desember síðastliðnum að hafinn skyldi undirbúningur að skráningu félagsins á hlutabréfamarkað. Hún átti að eiga sér stað á seinni hluta þessa árs.

Í maí var Íslandsbanka og Straumi fjárfestingabanka falið að undirbúa skráninguna. Hlutafé var síðan aukið í júlí og er nú 200 milljónir króna að nafnvirði. Samkvæmt heimildum Fréttablaðsins er skráningarlýsing nánast tilbúin og verður birt á allra næstu dögum. Stefnt er að því að lokað hlutafjárútboð fyrir fagfjárfesta verði haldið skömmu síðar og útboð fyrir almenning í kjölfarið.

Fréttastofa Stöðvar 2 greindi frá því í sumar að lykilstjórnendur Eimskipafélagsins myndu fá að eignast hlut í félaginu á mun lægra gengi en áætlað væri að skrá félagið á. Gert er ráð fyrir að þeir fái að eignast 700 þúsund hluti í Eimskip.

Eimskip hagnaðist um átta milljónir evra, tæplega 1,3 milljarða króna á gengi dagsins í dag, á fyrstu sex mánuðum ársins 2012. Heildarvelta félagsins á tímabilinu var 198 milljónir evra, um 32 milljarðar króna. Hún jókst um tíu prósent á milli ára þegar búið var að taka tillit til einskiptisliðar upp á 6,4 milljónir evra, rúman milljarð króna. thordur@frettabladid.is