Kanna hvernig ríkið geti brugðist við ofurlaunum slitastjórnamanna

Kannað verður hvort ríkið geti gripið til viðbragða vegna ofurgreiðslna til slitastjórna föllnu bankanna og fyrirtækja og aðila þeim tengdum. Málið var rætt á fundi efnahags- og viðskiptanefndar Alþingis í morgun. Mikil umræða var á dögunum um gríðarlega háar greiðslur til slitastjórnarmanna Glitnis, Steinunnar Guðbjartsdóttur og Páls Eiríkssonar.

„Við vorum að hefja umfjöllun um það að kanna hvaða eftirlit Fjármálaeftirlitið hefur með greiðslu slitastjórna til fyrirtækja tengdum slitastjórnum," segir Helgi Hjörvar, formaður efnahags- og viðskiptanefndar Alþingis, og á þar meðal annars við lögmannstofur. Fulltrúar frá Fjármálaeftirlitinu mættu á fundinn. Helgi segir að nefndin hafi óskað eftir upplýsingum um greiðslur í öllum þeim þrettán slitastjórnum sem eru starfandi. „Við vildum bara fá heildstætt yfirlit yfir þetta," segir hann.

Helgi segir að kröfuhafarnir sjálfir beri mikla ábyrgð á greiðslunum. „Það er ljóst á þessu að þetta aðhald liggur hjá kröfuhöfunum sjálfum," segir Helgi og bætir því við að kröfuhafar geti og hafi raunar leitað til héraðsdómara vegna hárra greiðslna. „Það var óskað eftir því á fundinum að Seðlabankinn yrði fenginn fyrir nefndina. Eignarhaldsfélag Seðlabankans er verulegur kröfuhafi. Þar liggur ein aðkoma ríkisins," segir Helgi.