Litlar líkur á að Björgólfur Thor fái nokkuð úr Actaviskaupum

Reiknað er með að bandaríska lyfjafyrirtækið Watson tilkynni um tilboð sitt í Actavis á morgun, þriðjudag. Litlar sem engar líkur eru á að Björgólfur Thor Björgólfsson muni ríða feitum hesti frá kaupum Watson á Actavis ef marka má frétt á Bloomberg fréttaveitunni.

Í frétt Bloomberg segir að tilboð Watson muni nema 4,5 milljörðum evra, eða um 750 milljörðum króna. Þetta er minni upphæð en nemur skuld Actavis við Deutsche Bank.

Bloomberg segir að bankinn muni þar að auki gera kröfu um aukagreiðslu upp á um 400 milljónir evra vegna afskrifta bankans á eignarhaldi sínu í Actavis á þessu ári en Deutsche Bank afskrifaði svipaða upphæð á síðasta ári. Afskriftir þessar eru tilkomnar vegna endurskipulagningar á skuldum Actavis þegar Deutsche Bank tók við yfirráðum félagsins.

Áður hefur komið fram í fréttum að hugsanlega myndi Björgólfur Thor fá allt að 20 milljarða króna úr sölunni á Actavis en þá var miðað við að söluverðið væri yfir 5 milljarðar evra.