Lögreglan hafði afskipti af 50 bílum sem lagt var ólöglega

Mikið er um stöðubrot í Reykjavík en lögreglan þurfti að hafa afskipti af fimmtíu ökutækjum um liðna helgi vegna þessa. Þannig var fjölmörgum bílum lagt ólöglega í nágrenni og við Skautahöllina og Húsdýragarðinn en lögreglu bárust margar kvartanir vegna þessa.

Lögreglan minnir á að vandræði skapist oft fyrir gangandi vegfarendur vegna þessa „svo ekki sé nú talað um neyðarakstur lögreglu, slökkviliðs og sjúkraliðs þegar hætta er á ferðum."

„Í Laugardalnum og nágrenni hans eru jafnan næg bílastæði en svo virðist sem margir setji það fyrir sig að leggja örstuttan spöl frá áfangastað og ganga síðan í fáeinar mínútur áður en kemur að því að njóta skemmtunar og/eða útivistar á þessu og raunar ýmsum fleiri svæðum á höfuðborgarsvæðinu."

„Sem fyrr hvetur lögreglan ökumenn til að leggja löglega, m.a. til að þeir komist hjá útgjöldum en nú er 5000 kr. sekt vegna stöðubrots en gjaldið rennur í Bílastæðasjóð. Sé hins vegar lagt í stæði, sem eru sérmerkt fötluðum, þarf viðkomandi að greiða enn meira, eða 10000 kr."