Orkuveitan ver sig gegn gengissveiflum krónunnar

Stjórn Orkuveitu Reykjavíkur (OR) hefur samþykkt að gera gjaldmiðlaskiptasamning við Arion banka til að verja fjárhag fyrirtækisins gegn gengissveiflum íslensku krónunnar. Samningurinn tryggir Orkuveitunni aðgang að erlendum gjaldeyri næstu sex árin og er verðmæti hans metið á um 15 milljarða króna.

Samningurinn er hinn þriðji á skömmum tíma sem Orkuveitan gerir til að treysta fjárhagslegar stoðir fyrirtækisins að því er segir í tilkynningu til Kauphallarinnar.

Fyrir um mánuði var tilkynnt um að samist hefði við evrópsku bankana Dexia Crédit Local og DePfa um breytingar á gjalddögum lána.

„Í mars lauk uppstokkun í rekstri Orkuveitunnar. Umbæturnar hafa aukið tiltrú á fyrirtækið og gert okkur kleift að styrkja fjárhagslegar undirstöður rekstursins. Erlendar skuldir Orkuveitunnar eru miklar og gengisáhætta einhver helsta ógnin við stöðugan fjárhag fyrirtækisins. Það er því ánægjulegt að ná samningi um varnir gegn þeirri hættu. Á síðustu vikum hefur Orkuveitan endursamið við erlend fjármálafyrirtæki og það er gleðiefni að nú er gerður samningur við öflugan íslenskan banka," segir Bjarni Bjarnason, forstjóri OR í tilkynningunni.