Mikil eftirspurn eftir hlutum í Icelandair Group

Þreföld umframeftirspurn eftir hlutum Íslandsbanka í Icelandair Group hf. var í lokuðu uppboði sem lauk í dag. Bankinn hugðist selja 5% í félaginu en eftirspurnin var slík að þegar upp var staðið var tilboðum í 10,29% af útgefnu hlutafé tekið.

Heildarsöluvirði útboðsins nemur 3,3 milljörðum króna. Fyrir söluna nam eignarhlutur bankans í félaginu 19,99% en eftir uppboðið á bankinn 9,7%.

"Það er afar ánægjulegt að sjá þann mikla áhuga sem fjárfestar sýna félaginu sem endurspeglast í fjölda tilboða í útboðinu. Vegna umframeftirspurnar var ákveðið að selja stærri hlut en lagt var upp með í upphafi. Eftir söluna mun Íslandsbanki ekki þurfa á undanþágu að halda frá FME til að halda á hlut í félaginu þar sem eignarhluturinn er kominn undir 10%. Þetta er í samræmi við stefnu bankans að minnka eignarhlut sinn í félögum sem eru í óskyldum rekstri," sagði Jón Guðni Ómarsson, framkvæmdastjóri Fjármálasviðs Íslandsbanka eftir söluna.