Fjárfestingar í nýsköpun í farvatninu

Tíu nýsköpunarfyrirtæki sýndu fjárfestum hugmyndir sínar á kynningarfundi í Arion banka í gær. Miklar samningaviðræður hófust í kjölfarið um tugmilljóna króna fjárfestingu. Nú þegar eru tveir samningar nánast í höfn.

Verkefnið Startup Reykjavík hefur staðið yfir í allt sumar fyrir tilstilli Arion banka, frumkvöðlasetursins Innovit og Klaks. Tíu smáfyrirtæki fengu fjármagn og aðstöðu til að vinna að viðskiptahugmyndum sem voru jafn misjafnar og þær voru margar. Í gær viðruðu fyrirtækin hugmyndir sínar á sérstökum fjárfestafundi.

Kristján Freyr Kristjánsson, framkvæmdastjóri Innovit segir að viðræður hafi farið strax af stað.

„Þarna voru tæplega 20-30 fjárfestingarfundir sem áttu sér stað og fjárfestarnir voru að hitta teymið í fyrsta sinn á staðnum," segir Kristján.

Viðræðurnar gengu vel og virðast strax hafa borið nokkurn ávöxt.

„Það eru alla vega tveir samningar sem ég veit af sem líta mjög efnilega út. Vonandi getum við tilkynnt um það fljótlega á næstunni," segir Kristján.

Hugmyndir fyrirtækjanna voru fjölbreyttar, allt frá framúrstefnulegri gítarkennslu á netinu til forrits í flugiðnaði. Fyrirtækin fara því fram á misháa fjárfestingu.

„Teymin eru að biðja um eitthvað á bilinu 20 milljónir upp í 100 milljónir. Það fer eftir fyrirtækinu og hvað það ætlar sér," segir hann.

Kristján segir að fjárfesting af þessum toga sé meiriháttar stökkpallur fyrir þessi smáu fyrirtæki og það verði spennandi að sjá hvernig þau spjara sig eftir að hafa tekið þátt í verkefninu.