Advania tapar í Noregi - veltan tæpir 13 milljarðar

Velta samstæðu Advania nam 12,9 milljörðum króna á fyrri árshelmingi 2012, sem jafngildir 5,3% vexti í tekjum frá sama tímabili í fyrra samkvæmt tilkynningu frá félaginu.

Öll félög innan samstæðunnar stóðu sig betur á fyrri árshelmingi 2012 en áætlanir gerðu ráð fyrir, að undanskildu Advania í Noregi að því greint er frá í tilkynningunni.

Að teknu tilliti til einskiptiskostnaðar í Noregi nam hagnaður samstæðunnar fyrir vexti, skatta og afskriftir (EBITDA) 502 m.kr. Að meðtöldum einskiptiskostnaði í Noregi er heildarafkoma á fyrirhluta ársins neikvæð um 506 miljónir.

Hlutfall erlendra tekna samstæðunnar á tímabilinu var 62%, en í dag starfa um 1.100 manns hjá samstæðunni í fjórum löndum: Íslandi, Noregi, Lettlandi og Svíþjóð.

Starfsemi félagsins á Íslandi og í Svíþjóð gekk vel á tímabilinu og talsverður stígandi í starfseminni í báðum löndum. Velta á Íslandi nam 5.465 m.kr. og jókst um 5,8% frá fyrra ári. EBITDA nam 358 m.kr. sem er 11,5% umfram áætlun. Velta í Svíþjóð nam 5.324 m.kr. og jókst um 10,3% frá sama tímabili síðasta árs. EBITDA hækkaði um 4,0% og var 183 m.kr.

Velta í Noregi dróst saman um 7,9% á fyrri árshelmingi 2012 og nam 2.187 m.kr. Verulegur einskiptiskostnaður féll til í Noregi á tímabilinu og var EBITDA neikvæð um 486 m.kr. Afkoman í Noregi litast af tveimur stórum þáttum. Annars vegar töfðust verklok á umfangsmikilli innleiðingu viðskiptakerfis fyrir stóran viðskiptavin, en kerfið var tekið í notkun á tímabilinu. Allur kostnaður við innleiðinguna var gjaldfærður og nam hann 216 m.kr. á tímabilinu. Ljóst er að verulegir tekjumöguleikar til framtíðar eru fólgnir í endursölu viðkomandi kerfis, bæði í Noregi sem og á öðrum markaðssvæðum.

Hins vegar var ráðist í viðamiklar aðhaldsaðgerðir og skipulagsbreytingar í Noregi á og vógu þar þyngst breytingar sem gerðar voru á lífeyriskerfi starfsmanna úr réttindatengdu í iðgjaldatengt, en sú breyting hafði í för með gjaldfærslu sem nam 183 m.kr. Breytingin hafði ekki áhrif á sjóðstreymi félagsins, en hefur jákvæð áhrif á rekstur sem nemur um 70 m.kr árlega. Alls nam einskiptiskostnaður í Noregi 453 m.kr.

„Frammistaðan í Svíþjóð og Íslandi er góð. Áætlun fyrir seinni árshelming lítur vel út en hún gerir ráð fyrir að velta ársins verði liðlega 26 milljarðar króna, sem er umfram áætlanir. Í kjölfar aðgerða sem gripið hefur verið til í Noregi er gert ráð fyrir að öll félög samstæðunnar skili afkomu á síðari hluta ársins í takt við áætlun eða betur," segir Gestur G. Gestsson, forstjóri Advania.