Olís komið í samkeppni við N1 í sölu á metangasi

Olís ætlar í vetur að opna nýja afgreiðslustöð fyrir metangas í Reykjavík. Hingað til hefur stöð N1 í Ártúnshöfða verið eina stöðin sem býður upp á metangas í borginni.

Metanorka og Olís skrifuðu á föstudag undir samning um kaup á afgreiðslustöð fyrir gasið, sem Metanorka afhendir í gámum á afgreiðslustað. Metanorka er dótturfélag Íslenska gámafélagsins og systurfélag Vélamiðstöðvarinnar sem rutt hefur brautina í metanbreytingum bíla. Félagið sérhæfir sig í framleiðslu, dreifingu og tækjabúnaði til afgreiðslu á metani.

Metanorka kaupir metangas af Sorpu, sem í sumar samdi einnig við Olís um sölu á gasi.

Metangasstöðin í Ártúnsbrekku fær gas úr lögn sem liggur úr Álfsnesi, en að sögn Samúels Guðmundssonar, framkvæmdastjóra vörustýringasviðs hjá Olís, náðust ekki samningar um verð á gasflutningi um lögnina. ?Við fengum tilboð í verð gegn um hana, en það var einfaldlega of hátt,? segir hann.

Um leið segir Samúel ljóst að Olís ætli sér í samkeppni við N1 um sölu á metangasi á bifreiðar. ?Við munum bjóða upp á samkeppnishæft verð,? segir hann. Dofri Hermannsson, framkvæmdastjóri Metanorku, segir að aukning í notkun á metangasi hafi verið afar hröð síðustu ár, en núna láti nærri að um 1.200 bifreiðar gangi fyrir slíku gasi. En um leið segir hann stefna í aukna framleiðslu á gasinu þannig að það þrjóti ekki í bráð. ?Álfsnesið nægir enn um sinn,? segir hann, en á næsta ári bætist svo við um milljón rúmmetra ársframleiðsla á gasi í metanorkuveri að Melum í Hvalfjarðarsveit. ?Ársnotkunin núna er um 2,4 milljónir rúmmetra,? bætir Dofri við. Einn rúmmetri af gasi jafngildir 1,1 lítra af bensíni.

Þá er stefnt að gasframleiðslu upp á 1,2 milljónir rúmmetra á Akureyri, auk þess sem horft er til möguleika á framleiðslu víðar. Dofri telur ekki ólíklegt að á næstu fimm til tíu árum komi upp fimm til tíu orkuver sem hvert um sig gæti framleitt eina milljón rúmmetra af metangasi.

Við bætast svo fyrirætlanir Sorpu um að framleiða gas jafnóðum úr lífrænu úrgangsefni, sem að sögn Dofra myndi líkast til þrefalda gasframleiðslu þar.

Samúel segir Olís þegar búið að tryggja fyrirtækinu ákveðið magn af gasi og fyrirtækið ætli að tryggja sér góðan skerf af því magni sem við bætist á markaðinn.

olikr@frettabladid.is