Efasemdir í OR-nefnd vegna Ölfusssamnings

„Þetta vakti mína undrun sem lögfræðings," segir Ása Ólafsdóttir, meðlimur úttektarnefndar um Orkuveitu Reykjavíkur, um samkomulag sem OR gerði við sveitarfélagið Ölfus í tengslum við virkjanamál á Hellisheiði.

Úttektarnefndin segir samning við Ölfus sem kynntur var á stjórnarfundi OR í apríl 2006 þarfnast „frekari skoðunar við".

Samningurinn fól í sér 52,5 milljóna króna greiðslu frá OR til Ölfuss vegna aukinna umsvifa og álags á bæjarstjórann og bæjarstjórnina í tengslum við virkjanaframkvæmdir á Hellisheiði og 75 milljónir króna til uppgræðslustarfa vegna rasks. Þá er kveðið á um aðrar skyldur OR og greiðslur til Ölfuss.

„Þegar við förum að skoða þetta betur og samhengi hlutanna þá sjáum við að á skipulagstímabilinu er verið að greiða þetta til Ölfuss og á sama tíma er Hveragerðisbær að senda mjög kröftug mótmæli vegna staðsetningar Bitruvirkjunar," segir Ása og minnir á að Skipulagsstofnun hafi hafnað Bitruvirkjun vegna umhverfissjónarmiða; virkjunin myndi trufla ferðaþjónustu. „Þegar settur umhverfisráðherra fékk síðan skipulagið til staðfestingar þá var því hafnað út frá því að það skorti jarðfræðilegar rannsóknir," bætir hún við.

Úttektarnefndin bendir á að greiðslur OR til Ölfuss hafi átt að gera „sveitarfélaginu kleift að hraða öllum umsögnum og leyfisveitingum sem þörf væri á".

Nefndin kveður viðmælendur sína hafa sagt að samkomulagið þyrfti ekki að vera óvenjulegt. Hæstiréttur hafi til dæmis sagt að Flóahreppur hafi mátt heimta 6,5 milljóna króna viðbótargreiðslu frá Landsvirkjun vegna gerðar aðalskipulags.

„Mér finnst þetta ekki sambærilegt," segir Ása og vísar þar í upphæðirnar í hvoru máli fyrir sig. „Líka vegna þess að þar [í Flúðahreppi] er verið að greiða fyrir ákveðið skipulag, nánast upp á krónu, reikning verkfræðistofunnar á meðan þarna [í Ölfusi] eru einhverjar óskilgreindar upphæðir," segir Ása sem kveður þennan þátt ekki hafa verið skoðaðan nánar af úttektarnefndinni þar sem hann varði ekki fjárhagsstöðu Orkuveitunnar.