Reyna sífellt að skafa af mínútur

DHL á Íslandi fagnar um þessar mundir 30 ára starfsafmæli. Markaðurinn ræddi við Atla Frey Einarsson, framkvæmdastjóra félagsins, af þessu tilefni um fyrirtækið, umsvifin í efnahagslífinu og þær breytingar sem orðið hafa á hraðflutningum síðustu áratugi.

DHL á Íslandi fagnar um þessar mundir 30 ára starfsafmæli. Sjálfur hefur þú starfað hjá fyrirtækinu helming þess tíma eða frá árinu 1997. Hver er þín saga innan fyrirtækisins?

„Ég byrjaði eiginlega fyrir slysni hjá DHL árið 1997. Ég fékk starf sem bílstjóri en vissi í raun lítið út í hvað ég var að fara. Ég man að ég var gjörsamlega úrvinda eftir fyrsta daginn en ég komst þó fljótt inn í þá menningu sem búið er að byggja upp innan fyrirtækisins. Það hefur verið lögð mikil áhersla á það alla tíð hjá DHL að hver dagur er ný áskorun og að við erum öll liðsheild sem er að vinna að sama markmiði. Þessi menning höfðaði til mín sem varð þess sennilega valdandi að mér leið strax ágætlega í starfi hjá fyrirtækinu. Þegar mér var svo boðin vinna áfram með skóla þá þáði ég það.

Á háskólaárunum var ég því oft að keyra til Keflavíkur klukkan sex á morgnana að ná í pappíra sem höfðu komið til landsins með næturfluginu áður en ég fór svo í skólann. Ég var svo seinna meir færður í innslátt sendinga og loks í söludeildina eftir útskrift. Síðar meir var ég gerður að sölustjóra og loks að framkvæmdastjóra. Það má því segja að maður hafi komið við alls staðar í fyrirtækinu sem er skemmtilegt því nú til dags er maður í reglulegum samskiptum við kúnna sem kynntust manni fyrst sem einhverjum gutta í útkeyrslunni.“

Hvernig hefur starfsemi fyrirtækisins breyst á þessum tíma og í hverju felst þjónusta þess í dag?

„Fyrirtækið hefur náttúrulega breyst töluvert á þessum fimmtán árum. Þegar ég byrjaði voru starfsmenn rétt rúmlega þrjátíu en starfsmannafjöldinn fór mest upp í sjötíu í byrjun árs 2008. Eðli þjónustunnar hefur einnig breyst. Þegar DHL byrjaði hér á Íslandi árið 1982 var litið á hraðsendingar sem neyðarþjónustu. Viðskiptavinina vantaði eitthvað með skömmum fyrirvara sem stafaði oft af því að eitthvað hafði gleymst eða bilað. Þá var því reddað með DHL. Grunnþjónustan er vitaskuld sú sama enn þann dag í dag, við flytjum vörur frá A til B með hraðsendingum en einnig nú með flugfragt og sjófragt. Nú til dags erum við hins vegar meira hluti af aðfangakeðju fjölmargra fyrirtækja.

Viðskiptavinir okkar eru kannski að flytja inn vörur vikulega en vilja ekki sitja með stóran lager. Í staðinn flytja þeir heldur reglulega inn með okkur ef eitthvað vantar upp á. Þetta er innflutningurinn en við þjónustum líka útflutningsfyrirtæki. Við getum tekið sem dæmi íslenskan fataframleiðanda sem er að selja sínar vörur erlendis. Til þess að vera samkeppnishæfur þarf hann að geta sent vörur héðan, þar sem framleiðslan er, á markaðina með mjög skömmum fyrirvara og þar komum við inn í myndina. Við hjálpum því fyrirtækjum með alhliðaflutningsþjónustu og stjórnun vörukeðju.“

DHL stillir sjálfu sér upp sem öruggu og hraðvirku flutningsfyrirtæki. DHL er vitaskuld alþjóðlegt fyrirtæki með starfsemi um allan heim. Hve mikilvægt er hið alþjóðlega net til að ná þessum markmiðum?

„Það er mjög mikilvægt. DHL hefur verið að byggja upp alþjóðlegt flutningsnet frá 1969 og samsteypan er mjög meðvituð um að hún er ekki sterkari en veikasti hlekkurinn. Þess vegna er lögð mikil áhersla á að mæla þann tíma sem allir flutningar taka mjög gaumgæfilega og fyrirtækið reynir sífellt að skafa mínútur af flutningstíma hvort sem er hér á Íslandi eða annars staðar. Ef þjónustan hér væri til dæmis slæm þá bitnar það ekki bara á okkar viðskiptavinum heldur líka viðskiptavinum DHL í fjölmörgum öðrum löndum sem eiga í viðskiptum við íslensk fyrirtæki. DHL á alþjóðavísu reynir því að styðja eins og það getur við hverja skrifstofu og við getum alltaf leitað aðstoðar ef við þurfum að taka á vandamálum. Að sama skapi er stundum leitað til okkar eftir ráðgjöf. Þetta er allt mikilvægt en auðvitað skiptir mestu máli að hafa gott starfsfólk sem við höfum verið heppin með. Ég held að það sé án vafa lykillinn að árangri í okkar geira.“

Segja má að umsvifin í þjóðfélaginu hverju sinni endurspeglist að einhverju leyti í umfangi sendinga og flutninga til og frá landinu. Sé tekið mið af þróun ykkar viðskipta, hvernig er staðan á Íslandi um þessar mundir?

„Þetta er mjög góð spurning enda er oft talað um að hraðsendingar geti verið mælikvarði á þrótt efnahagslífsins. Ef við skoðum fjölda sendinga á dag hjá okkur þá má segja að hlutirnir hafi verið á uppleið frá svona október 2009. Árið 2008 var mjög erfitt fyrir okkur. Innflutningur minnkaði mikið þegar gengi krónunnar féll um vorið og svo þegar bankarnir hrundu, gengið féll enn meira og gjaldeyrishöftin voru sett á blasti við ansi dökk mynd. Góður maður ráðlagði mér að leita að nýrri vinnu þar sem hann taldi að ekki einn einasti nagli yrði fluttur inn til landsins í fjögur ár hið minnsta. Það reyndist sem betur fer ekki rétt en við þurftum samt sem áður að fara í gegnum erfiðan niðurskurð. En svo þegar fór að líða á árið 2009 þá fóru hlutirnir aðeins að batna og hafa farið stigbatnandi síðan. Árið í fyrra var gott og okkur sýnist sem svo að árið í ár verði það líka.“