Breytingar gætu bætt stöðuna

Gengi hlutabréfa álrisans Alcoa hefur fallið í verði um 50% síðustu átján mánuði vegna lækkandi heimsmarkaðsverðs á áli. Búist var við því að í gær, eftir að Markaðurinn fór í prentun, að tilkynnt yrði um tap á rekstri á þriðja ársfjórðungi. Bloomberg segir svo frá.

Virði Alcoa nú er tæpir tíu milljarðar dala, en greiningarfyrirtækið Davenport & Co. segir hins vegar að hægt sé að auka virði samsteypunnar um 63% með því að skilja á milli fjögurra þátta rekstursins, námuvinnslu, álbræðslu, framleiðslu á álþynnum og loks framleiðslu á þróaðri hlutum og lausnum líkt og túrbínuspöðum og trukkahjólum.

Tveir síðastnefndu hlutarnir eru taldir verðmætari saman, heldur en öll samstæðan er nú.

Álverð náði 34 mánaða botni í ágúst og er ekki gert ráð fyrir að verðið næstu þrjú ár fari yfir það sem náðist í fyrra.

Talskona Alcoa neitaði að tjá sig um virði fyrirtækisins.