Styndu af hjartans þrá

Spurning: „Ég er ein af þeim konum sem eiga erfitt með að fá fullnægingu í kynlífi og ég held að það sé ekki út af þekkingarleysi kærastans.

Hann kann alveg sitt, mér finnst ég bara oft vera að hugsa um eitthvað allt annað þegar við stundum kynlíf. Ég ræð ekkert við það og það er mjög pirrandi því oft dett ég úr stuði og stundum tekur hann eftir því og spyr hvort ekki sé allt í lagi. Og auðvitað er allt í lagi þó stundum pæli ég í hlutum eins og hvort honum finnist ég sæt og hvað hann sé að hugsa, gera það ekki allir?

En hvað er best að gera til að geta einbeitt sér að kynlífinu?"

Svar: Það er alveg sama hversu góður elskhugi kærastinn þinn er, ef hugur fylgir ekki líkama þá getur fullnæging látið á sér standa. Hugurinn á það til að fara á flug í miðjum klíðum svo ekki hafa stórar áhyggjur af því, það er fullkomlega eðlilegt. Hins vegar er það leiðigjarnt ef það kemur í veg fyrir ánægju og þá eru til nokkrar æfingar sem gott getur verið að grípa til.

Fyrst þarftu að kveða niður streituvaldandi og neikvæðar hugsanir um eigin líkamsímynd. Bólfélaganum finnst píkan æðisleg, húðin falleg, andlitið geislandi og brjóstin löguleg. Hann er að stunda kynlíf með þér svo honum finnst þú kynferðislega eftirsóknarverð og falleg. Það þarf ekkert að hafa fleiri orð um það en þú verður að temja þér að kveða niður þessar hugsanir og rækta ást á eigin líkama. Það er sama hversu oft hann segir þér það, ef þú stendur ekki með sjálfri þér þá gerir það enginn fyrir þig. Æfðu þig í að skoða þig nakta og lærðu að meta eigin fegurð. Mig grunar að þegar þetta er komið þá verði auðveldara að einbeita sér að kynlífinu.

Svo er það öndunin. Fylgstu með andardrætti ykkar beggja og ekki halda aftur á þér, andvarpaðu og styndu af hjartans þrá. Ef hugurinn er enn á reiki þá getur verið gott að nota orð, ?þetta er gott? eða segja nafn elskhugans. Einnig er sá möguleiki fyrir hendi að þrátt fyrir kunnáttu kærastans þá henti hans snertingar þér ekki og því sé kominn tími til að breyta til. Þú gætir prufað að taka við stjórninni og reynt að halda þér þannig við efnið og aukið um leið unaðinn. Gangi ykkur vel og góða skemmtun!



Taktu þátt! Sendu Siggu Dögg póst á netfangið kynlif@frettabladid.is og segðu henni frá vandamáli úr bólinu. Lausnin gæti birst á Vísi og í Fréttablaðinu.